والشمس تستعد للرحيل بعد عمل يوم شاق من احد أيام شهر أغسطس الطويلة,وفى إحدى إشارات المرور ثقيلة الظل,وأصوات ضجيج السيارات تعزف لحنا غير متناغم التفتت إلىّ وقالت : أنا عايزة بس أفكرك إن فيه خيط رفيع أوى بين الحب والصداقة.
هو: متخافيش حنفضل نستعبط لحد منعديه.
هى : ساعات كتيرة بسال نفسى..أنت ليه مطلعتش شبه توم كروز.
هو: خلقة ربنا
هى : أو حتى براد بيت..أيه ساكت ليه؟
هو: يعنى أنا لو شابه واحد فيهم كًنت حابوصلك ليه؟!!
هى : أيه؟؟؟
هو : قصدى أن أكيد مافيش واحد فيهم حيحبك أدى.
هو : تفتكرى أيه أخرة حبنا.
هى : نتجوز.
هو : وبعدين؟
هى : نخلف.
هو : وبعدين ع السجن على طول..
هى : ليه بس النظرة السوداوية دى؟!!
هو : ماهو أنا لما ابقى خيالى الناس يقولولى إنزل عل الأرض,ولما أنزل ع الأرض الناس يقولولى بلاش سوداوية,اعمل ايه بس,افتح الشباب ولا اقفله؟
هى : هو إحنا مجانين؟
هو : لأ.
هى : طب الناس هما اللى مجانين و إحنا اللى عاقلين.
هو : برضوه لأ.
هى : أُمال أيه؟
هو : إحنا ناس طبيعين جداً بس كل مشكلتنا إننا مش عارفين نتكيف مع الحياه اللى عايزه اصلا مكيف..ممكن اسالك سؤال بايخ؟
هى :اسال.
هو : هو إحنا ليه بنحب بعض؟؟؟
هى : يعنى تقدر تقول إحتياج للحب وحبنا لبعض هو اللى بيشبع الأحتياج ده
هو : يعنى لو ماكانش عندنا إحتياج ما كناش حنحب بعض ؟طب مين فينا اللى بيحتاج للتانى..بقولك ايه غيرى الموضوع.
هى : ماشى,حاجة غريبة إحنا نعرف بعض بقالنا سنين ومع ذلك لما بنشوف بعض مابنتكلمش زى ما بنتكلم على الشات.
هو : الصراحة ما أعرفش السبب بس أوعدك لما أعرفه حابقى أكتبهولك.
هى :الا على فكرة,إنت ليه دايماً بتكتب عنى شِعر على الورق,ليه ماتقولهوليش باللسان أحسن.
هو : علشان إنتى بتبقى أجمل على الورق.
هى : طب خلى الورق ينفعك.
هو : رايحة فين؟
هى : هجيبلك رزمة ورق.
هو : اوعى تتاخرى.
فتحت باب السيارة ونزلت,وانفتحت الإشارة,وانطلقت السيارة,صرخت في السائق لينتظرها
فتعجب واقسم انه لم يوجد احد معنا في السيارة.
0 التعليقات:
إرسال تعليق